LS Elva - Thunder Black-ის ინსპირაციით შექმნილი ახალი ქართული შრიფტი

 

 

LS Elva ლუკა სარიშვილის მიერ შექმნილი ახალი ქართული დეკორატიული შრიფტია. 

 

LS Elva შთაგონებულია THUNDER BLACK-ის მძიმე, კონდენსირებული ხასიათით და ადაპტირებულია ქართული დამწერლობის სტრუქტურასა და რიტმზე. 

მასიური, ძლიერი ვიზუალური წონის მქონე ასოები, ერთი შეხედვითვე იპყრობს ყურადღებას, რაც მთლიან შრიფტს დომინანტურ და თანამედროვე იერს აძლევს.

სიმბოლოების ნეგატიური სივრცე მინიმუმამდეა დაყვანილი. შიდა კონტურები ვიწროა, ფორმები ერთმანეთთან ახლოს დგას და ქმნის კომპაქტურ, მკვრივ კომპოზიციას, რაც აძლიერებს შრიფტის სკულპტურულ და ინდუსტრიულ ხასიათს. 

 

 

 

ამავდროულად, შრიფტში კარგადაა დამუშავებული ქართული ასოების ფორმები და ინარჩუნებს კითხვადობას. 

 

შრიფტი მოიცავს მხედრულ და მთავრულ ქართულ ანბანებს, ციფრებს, სასვენ და ვალუტის ნიშნებს.

 

 

შრიფტი საკმაოდ აქცენტურია და ეფექტური იქნება სათაურებისთვის, პოსტერებისთვის, ბრენდირებისა და ექსპერიმენტული პროექტებისთვის, სადაც სრულად გამოავლენს თავის ენერგიას. 

 

 

 

 

LS Elva კარგად იპყრობს ყურადღებას. დიდ ზომებში გამოყენებისას თავისუფლად იქცევა ხმამაღალ, თავდაჯერებულ ვიზუალურ ელემენტად და შექმნის ძლიერ ვიზუალურ იდენტობას. 

 

 

 

 

ᲛᲔᲚᲜᲘᲡ ᲛᲐᲮᲔᲔᲑᲘ

 

 

შრიფტში გამოყენებულია მელნის მახეების (Ink Trap) ტექნიკა შეერთებსა და შიდა კუთხეებში. კარგად გამოხატული ჩაჭრები ქმნის ვიზუალურ აქცენტებს და ფონტს ინდუსტრიულ და სკულპტურულ ხასიათს ანიჭებს. მატებს ასოებს რიტმსა და სიღრმეს.

 

ᲙᲣᲠᲡᲘᲕᲘ

 

 

შრიფტს დამატებით აქვს კურსივი სტილი. დახრილი ფორმები მძიმე ასოებს განსაკუთრებულ ექსპრესიულობასა და დინამიურ ხასიათს ანიჭებს.

 

 

 

 

ᲐᲚᲢᲔᲠᲜᲐᲢᲘᲣᲚᲘ ᲐᲡᲝᲔᲑᲘ

 

 

შრიფტში ჩართულია ალტერნატიული ასოები, რაც აფართოებს გამოყენების შესაძლებლობებს და დიზაინერებს აძლევს  მეტ შემოქმედებით თავისუფლებასა და გამოხატვის სივრცეს.  

 

 

 

შრიფტზე მეტს გაიგებთ ლუკა სარიშვილისგან:

 

რა ხდება ხოლმე ინსპირაცია შრიფტის შექმნისას? 

 

ინსპირაცია Thunder black-იდან წამოვიდა. შრიფტის შექმნის მთავარი იდეა ვიწრო ქაუნთერებშია. თხელი ხაზები ფორმებს ისე ჭრის რომ ასოები იკვეთება. ფორმები მასიურია, სასუნთქი ადგილი თითქმის არ არის, მაგრამ ასოები ამის მიუხედავად აღქმადია.

 

 

 

შრიფტის შექმნა მრავალსაფეხურიანი პროცესია, რა ნაწილი იყო თქვენთვის ყველაზე რთული და შრომატევადი?

 

 

ლათინურიდან ქართულის ადაპტაციის გააკეთება ბევრ გამოწვევასთან არის დაკავშირებული, რადგან ფორმები და სტილი განსხვავდება. ამ პროცესში ჩემთვის ყველაზე რთული იყო შემექმნა მაქსიმალურად მძიმე და მკაცრი ასოები ისე რომ შემენარჩუნებინა ქართული შრიფტისთვის დამახასიათებელი დინამურობა.

 

თქვენი აზრით, რომელი ქართული სიმბოლოების დიზაინის შემუშავებაა ყველაზე რთული ტიპოგრაფებისთვის ტექნიკური თუ ვიზუალური თვალსაზრისით?

 

ვფიქრობ ქართულ ანბანში ბევრი რთულად შესაქმნელი სიმბოლოა, მათ შორის ყველაზე მეტად ჯ და ჭ , მაგრამ რამდენადაც რთულია იმდენად იძლევა საინტერესო შესაძლებლობებს და გამოსავალს.

 

 

 

 

ასეთი მასიური ფორმების შექმნისას ერთ-ერთი მნიშვნელოვანი გამოწვევაა შრიფტის კითხვადობის შენარჩუნება. რა სირთულეებს გადააწყდით ამ მხრივ?

 

 

ასეთ მჭიდრო სივრცეებში, სადაც მხოლოდ წვრილი ხაზები ჰყოფს ფორმებს, რთული იყო გამომეკვეთა თითოეული ასოსთვის დამახასიათებელი დეტალები, ისე რომ არ გავცდენოდი მკაცრად დადგენლი სტილს

 

 

ᲚᲘᲪᲔᲜᲖᲘᲐ ᲓᲐ ᲩᲐᲛᲝᲢᲕᲘᲠᲗᲕᲐ

ᲚᲘᲪᲔᲜᲖᲘᲐ: შრიფტი უფასოა როგორც პირადი, ასევე კომერციული სახით გამოსაყენებლად. 

 

ᲩᲐᲛᲝᲢᲕᲘᲠᲗᲔᲗ ᲨᲠᲘᲤᲢᲘ: ლინკი 

სტატიის ავტორი: 

 

 

   მარიამ ჩაჩანიძე

 

 

 

 

 Facebook     Instagram